Kiriti బెంగళూరు: సూర్యుడిపై పరిశోధనలకు ఉద్దేశించిన ‘ఆదిత్య- ఎల్‌1 (Aditya-L1)’ ఉపగ్రహం తన లక్ష్యం దిశగా ప్రయాణిస్తోంది. ఇప్పటికే భూ గురుత్వాకర్షణ పరిధిని దాటేసింది..
ఈ క్రమంలోనే వ్యౌమనౌక మార్గాన్ని సరిదిద్దే విన్యాసాన్ని (Trajectory Correction Maneuvre) విజయవంతంగా చేపట్టినట్లు భారత అంతరిక్ష పరిశోధన సంస్థ (ISRO) వెల్లడించింది. లగ్రాంజ్‌ పాయింట్-1 (L1) దిశగా దూసుకెళ్తోన్న వ్యౌమనౌకను దాని నిర్దేశిత మార్గంలో ఉంచేందుకు టీసీఎం దోహదపడుతుంది. అక్టోబరు 6వ తేదీన 16 సెకన్లపాటు ఈ విన్యాసాన్ని నిర్వహించినట్లు ఇస్రో తెలిపింది..
అంతకుముందు ఇస్రో శాస్త్రవేత్తలు.. సెప్టెంబరు 19న ట్రాన్స్- లగ్రాంజియన్ పాయింట్ 1 ఇన్సర్షన్ (TL1I) విన్యాసాన్ని నిర్వహించి.. ఆదిత్య ఉపగ్రహాన్ని ‘ఎల్‌ 1’ వద్దకు చేర్చే మార్గంలో ప్రవేశపెట్టారు. అనంతరం ఈ విన్యాసాన్ని ట్రాక్‌ చేయగా.. ట్రాజెక్టరీని సరిదిద్దాల్సిన అవసరం ఉందని గుర్తించారు. దీనికోసం తాజా విన్యాసం అవసరమైందని చెప్పారు. ఆదిత్య ఎల్‌-1లోని వ్యవస్థలన్నీ సజావుగా పనిచేస్తున్నాయని, లగ్రాంజ్‌ పాయింట్-1 దిశగా దూసుకెళ్తోందని తెలిపారు. మరికొన్ని రోజుల్లో మాగ్నెటోమీటర్ మళ్లీ ఆన్ చేస్తామన్నారు..
‘చంద్రయాన్‌-3’ విజయవంతం తర్వాత సూర్యుడిని పరిశోధించేందుకుగానూ ఇస్రో సెప్టెంబర్‌ 2న ఆదిత్య-ఎల్‌ 1 ప్రయోగం చేపట్టింది. పీఎస్‌ఎల్‌వీ సీ-57 వాహకనౌక ద్వారా ఈ ఉపగ్రహ ప్రయోగాన్ని నిర్వహించింది. సౌర వాతావరణాన్ని లోతుగా పరిశోధించడం ఈ ఉపగ్రహం లక్ష్యం. భారత్‌ తరఫున సూర్యుడిని అధ్యయనం చేసే ఇస్రో తొలి మిషన్‌ ఇదే. భూమి నుంచి 15 లక్షల కి.మీ దూరంలో ఉన్న లగ్రాంజ్‌ పాయింట్-1 చేరాక.. దాని కక్ష్యలో పరిభ్రమిస్తూ సూర్యుడిపై పరిశోధనలు మొదలు పెడుతుంది..
